Im Laufe dieses Jahres wurde mir der Posten der Aktuarin unseres Vereins übergeben und ich nehme daher heute zum ersten Mal die Feder zur Hand, das Protokoll der Jahresversammlung niederzuschreiben.

 

                                        JAHRESVERSAMMLUNG

                               

                          Sonntag-Abend den 24. November 1929

                                                  im Hotel Adler

 

1. Freundlich begrüsst die Präsidentin, Frl. Elsa Geiger, die anwesenden

    Mitglieder unseres jungen Vereins zur ersten Jahresversammlung.

 

2. LT. Appell sind von den 21 Mitgliedern 19 anwesend.

 

3. Durch die Präsidentin werden die Statuten vorgelesen und nach

    gegebener Diskussion einstimmig gutgeheissen.

 

4. Die Kassierin Frau Ammann-Geiger verliest die Jahresrechnung, die

    genehmigt und bestens verdankt wird. Bei dieser betragen

 

    die Einnahmen                                Fr. 359.40

    die Ausgaben                                   Fr. 191.90

    Reines Vermögen per 31.12. 29   Fr. 167.50

 

5. Wahlen Der bestehende Vorstand wird einstimmig für das nächste

    Jahr wieder gewählt.

 

6. Allgemeine Umfragen Nachdem namhaft hier nicht diskutiert wird

    erklärt die Präsidentin Schluss der Versammlung.

 

Nach diesen geschäftlichen Abwicklungen gehen wir nun über zum

gemütlichen Teil, der durch ein Gedicht von Frau Ammann-Geiger mit folgendem Inhalt begonnen wird...( Im Beitragsheft von Frau A. niedergeschrieben)

Es sei übrigens der Verfasserin an dieser Stelle nochmals im Namen des ganzen Vereins herzlichen Dank ausgesprochen. Nach beendentem gutgemundeten Nachtessen wird nun tüchtig getanzt.

Von einzelnen Mitgliedern werden Coupilès zum Besten gegeben, die

viel Humor in die anwesende Gesellschaft bringen. Auch an den verschiedenen Spielen erfreut sich alles sehr und zu hauptsächlichem Gelächter geben folgende Resultate Anlass:

 

S`ist mer alles ei Ding                            unter der Bettdecke

Freut Euch des Lebens                           unter der Bettdecke

Ich hatt einen Kameraden                     unter der Bettdecke

 

und ähliches mehr.

 

Leider sind die Stunden nur zu rasch verflossen und eines nach dem Andren verabschiedet sich mit der bestimmten Hoffnung im Herzen,

dass die nächste Jahresversammlung ebenso gut und humorvoll ausfallen werde.

 

                                                                      Die Aktuarin

                                                                      Hedwig Model

 

Ermatingen 29. XI. 1929

 

 

 

 

 

 

 

 

 

 

 

 

 

 

Füfsg Johr, das isch e langi Zit,

drum fieret mir es Fäschtli hüt.

Es Jubiläum schlicht und eifach,

si tuet`s für e ganz e grossi Sach!

 

Die Fraue do zmol e Grüppli isch es gsi,

sie händ gwoget, en ganz en grosse Schritt.

G`spötlet isch worde ums her,

Aber so öpis git`s im Läbe, - oh her je!

 

Nüd lugg loh, das händ`s dänkt,

und wenn`s es bitzteli chiid am Dorf-Afang und End.

D`Manne sind`s gsi, - s`isch immer so,

wo d`Fraue nüd wend uf cho lo.

 

Überhaupt, e Dameriege händ mir jo,

für was no alti Fraue. - Das langet scho.

Aber gnau die müend rüschtig si und fit,

drum sind mir so e grosses Schärli hüt.

 

Am 24. Nov. 1929 händ`s di erst Versammlig g`ha,

lueg au 19 mitglieder sitzet im Stübli da.

Es Kassebuech händ`s gführt,

170.- Fr. in bar, s`isch nüd grad nüt.

 

Jahresversammlig 6. Dez. 1930,

im Hotel Adler sind`s do gsi.

Bim Traktandum Wahle, oh je,-

de ganzi Vorstand hät de Rückzug gäh!

 

E strengi Disziplin händ`s gführt,

bim e Usflug wird nüd lang telefoniert.

Zuewachs gits, das isch jo klar,

uf 25 stiegt d`Mitgliederzahl.

 

Jahresversammlig 28.Nov. 1931,

i der Schönhalde sind`s do gsi.

Noch der Versammlig, en bunte Obet händ`s ufgführt,

e Tombola, zu Gunste vo de arme Lüüt.

 

D`Fraueriege, e Wohltätigkeitsinstitution,

die Tombola, das hät sich g`lohnt.

Mit 450.- Franke,

sind`s stolz uf`s Gmeindamt gange.

 

Jahresversammlig 4. Dez. 1932,

do sind`s im Adler gsi.

26 Mitglieder sind jo scho,

und de Betrag, de choscht en Franke bigoscht.

 

En Medizinball, - das sött me ha,

jetz chömmet üsi Manne im Restaurant dra.

D`Frau Ammann führt e Sammlig dure,

20.- Fr. gits, - und ohni murre!

 

Im Februar 1933

ladet`s zu nere usserordentliche Versammlig i.

Fräulein heisst`s, wenn `d 28gi bisch,

so chumm go turne, mir freuet üs.

 

Im Herbst isch scho wieder e Tombola gsi,

damals hät`s no me rentiert.

1928.- Fr. händ`s zämme brocht,

mit Stolz überbringet`s das em Gmeindrot.

 

En Vereinsusflug - Was söll`s do gäh?

vom Untersee an Zürisee.

uf de Üetliberg und in Zoo,

hoffentli sind wieder alli 13 heizue cho.

 

Johresversammlig 13. Nov. 1933,

do sind`s i der Schönhalde gsi.

D`Präsidentin klagt, de Turnstundebsuech sei schlecht,

vo 26 Mitglieder, zwei, vier, sechs! -

 

Johresversammlig 17. Nov. 1934,

do sind`s im Adler gsi.

Vo 20 Mitglieder, o her je,

do sind no 11 do gsi! -

 

Wahle sind, worum chunnt`s do dezue?

der alti Vorstand will sini Rueh.

D`Frau Ribi-Bommeli jetzt obe am Tisch,

Kassierin d`Frau Sauter- Müller wird.

E Schrieberi müend mir au no ha,

und so wird d`Frau Goldinger Aktuar! -

 

Leiteri si und Präsidiere,

s`Marti dänkt,- do chönnt me au öpis verdiene.

All  Wuuche en Obig vor soviel Fraue stoh,

3 Stutz wär sicher en rächte Loh!-

 

1937,38,39,40,

do isch d`johresversammlig zäme gsi.

Aktuarin si, das isch schwer

drum händ`s sit 1937 e keini me!-

 

Im 1939 händ`s im Leue e Versammlig gha,

sicher zum wähle en Aktuar.

D`Frau Friedel Bügler hät`s denn überno,

und mit de Frau Engelmann händ`s e neuis Mitglied übercho!-

 

1939, das isch e bsunders Johr,

das weiss au d`Fraueriege do.

Drum nix wie los an Zürisee,

denn s`Landidörfli, das muesch gseh.

 

En Theaterbsuech, das isch e so e Sach,

bi soviel Fraue, bis alles klappt.

Mit allem her und hie,

isch es im 42 sowit gsi!-

 

Johresversammlig 1945, do sind`s im Leue gsi,

d`Präsidentin hät Jubiläum hüt.

10 Johr lang tuet sie das Schiffli stüüre,

sicher isch das en Grund zum Fiire.

 

im 1948 isch wieder Versammlig gsi,

d`Frau Ammann isch immer no a de Spitze gsi.

De Verein wachst wieder um eis Glied,

d`Frau Trudi Spreiter tretet i.-

 

De Verein wachst immer me,

4 neui Mitglieder chönnets ufneh.

Frau Eigenmann,Kunz,Kasper und Preyer,

und au d`Präsidentin got i Turnerinne Reihe.

 

Im 1952 hät e neui Präsidentin s`Stüür überno,

erliechtert stoht jetz d`Leiteri do.

d`Frau Engelmann, sie isch es gsi,

Sie turnet hüt no frisch und fit.

 

Am 23. April 1953 ist Versammlig gsi,

go Reise wennd`s wie chönnt`s au anders si.

Is Theater uf Züri no derzue,

und d`Frau Frischknecht,Strassburger,Hausammann

nähmets zum turne uf.

 

Am 23. Jan. 1954 isch Versammlig gsi,

es Jubiläum fiiret`s hüt.

E Freud isch es zum Feste und Fiire,

heisst`s doch 25 Johr Fraueriege.

 

Au s`Feschte got verbi,

und jetzt sind 25 turnerinne debi.

Viele sind gange, die andere bliebet,

wenn`s die zweite 25 Johr au no wend fiire.

 

Die nöchscht Versammlig isch im Februar 1955 gsi,

e neui Leiteri zücht jetzt i.

D`Frau Spreiter tuet jetzt appeliere,

und au d`Frau Wydler will go trainiere.

 

31. Jan. 1956, do isch Versammlig gsi,

au s`Marti leitet no mit dä Trudi mit.

Abwechslig wend`s i dem Verein,

drum gönd`s uf e 2 tägigi Reis!

 

Insbruck, das isch s`Ziel,

und si hoffet, es büti viel.

Es hät sich g`lohnt, is Usland s`go,

trotzdem sind`swieder gern an Untersee cho!

 

Am 9./10. Juli isch Züri Turnfest gsi,

3 turnerinne sind als Schlachtebummler debi.

Sie erinneret sich sicher no do dra,

neu itrete isch d`Frau Zimmermann!

 

Am 28. Januar 1957, isch die nöchst Versammlig gsi,

Tägerwile oder Berlinge maschiere, au da gits.

See uf und ab, das händ`s jetz gmacht,

z`letscht führt`s de Car no um de Bach!-

 

De Verein, de wachst immer meh,

dass s`turne guet tuet, hät au d`Frau Stader gseh.

Fit si, will no mängi Frau,

au d`Frau Schäfli und Eglauf.

 

De 19. Januar 1959 isch gsi,

die Versammlig isch aber bald verbi.

Au i dem Johr wenn`s nüd raste,

drum wenn`s mache e Bergtour uf de Hoch Kaste!-

 

Am 8. Dezember goht`s Vereinsjohr z`End,

au de Samichlaus hät a si denkt.

Zuewachs hät`s gäh i dere Periode,

Frau Fischer, Rotach und au Rohrer!-

 

Amtsmüed isch d`Präsidentin worde,

doch für d`Nochfrog isch scho g`sorget

Frau Stader wird a Stell vom Bethli gwählt,

und neu derzue chunnt d`Frau Kidaisch!-

 

Am 10. Februar 1961  isch es gsi,

s`Präsidialjohr isch wieder verbi.

D`Frau Stader git em Präsident de Lauf,

und neu übernimmt`s d`Frau Eglauf!-

 

De Mai isch cho, zum wandere isch Zit,

is Schlössli Bottighofe isch nüd gar so wit.

Sogar Zit händ`s do gfunde,

für es Jässli i fröhlicher Runde!-

 

Emol öpis anders händ`s gmacht,

en OL als Meisterschaft.

Herzog, Schäfli und Engelmann händ gwunne,

die sind sicher ordli im Feld ume g`sprunge.-

 

Vom Februar 62 a herscht e strengi Disziplin,

Appell git`s bi Usmärsch und bi no viel.

E Reis in Tessin, zwä Tag lang,

mit soviel Zahweh,s`wird eim bang.

Wer isch itrete i dem Johr,

Dällenbach und Otto, beidi sind no do.

 

Im 1963 ladet d`Männerriege zum Maibummel i,

i der Vogelsanghütte seis gsi.

De Chlaus ischis Schützehuus cho,

aber oh her je, tönt s`nöchstmol d`Stube suber verloh.

 

Au im 64gi wenn`s go Maie wandere go,

noch Klingezell hät er g`führt, der lange Pfad.

Nomol zrugg laufe, das git`s nüd,

was isch bequemer als mit em Schiff!-

 

So e schöni Reis, das git`s nüd all,

do muess me halt uf d`Riederalp.

Wald, Wiese, Berge und Schnee,

so schö chasch es nu bim Sunneufgang g`seh!-

 

Üsi Leiteri, s`Trudi isch immer fit,

10 johr lang turnet sie vor  und pfifft,

s`Jubiläum cha sie fiire,

gäll Trudi, tuesch üs nomol 10 Johr dirigiere!-

 

Im 1965 sind mir an Spieltag uf Märstette,

de Pokal im Volleyball wend mir erkämpfe.

S`isch nüt grote, o her je,

viellicht gits e anders Johr me!-

 

D`66 er Maitour,

die händ mir z`Obig gmacht, is Haidehuus.

E schöni Schar isch gsi,

6 Mitglieder sind neu debi.

 

Füchsli nimm die guet in acht,

wenn em Jäger d`Büchs denn chracht.

I d`Flinte bisch glaufe, jetzt isch`s passiert,

is Chasper`s Chuchi wirsch i balsamiert.

 

1967: Mir durblätteret üsi Johresbricht,

au d`Frau Engelmann isch Oberturneri gsi.

En Maibummel, das isch klar,

mit dä Männerriege goht`s i Kuehstallbar!-

 

1968: nüd nu turnet und gspielt isch worde,

nei au en Kegelobet i Steckbore.

Au bastle isch programmiert,

Chefin do d`Frau Wydler wird!-

 

1969: 14 Johr lang hät s`Trudi gleitet scho,

jetz will si au i d`Reihe stoh.

E gueti Leiteri finde, das isch schwer,

doch d`Frau Rotach chönnt das Ämtli näh.

 

Mir händ sie gfroget, d`Rosmarie,

wie stellst di do dezue i?

I chönnt`s emol probiere,

und die Fraue e bitzeli trainiere!-

 

Der Samichlaus, der gueti Ma,

der stoht hüt persönli da.

s`Berti hätti sölle mit,

aber Samichlaus, so öpis git`s doch nit.-

 

Wer würd üs denn no Chueche backe?

wenn du sie würdisch in Sack ie packe.

Wer würdi wirte im Turmrestaurant?

Los s`Berti do, defür häb Dank!-

 

Es neuis Mitglied hämmer übercho,

z`oberst isch es hüt, im Jubiläumsjohr.

d`Frau Henauer isch es gsi,

Präsidentin,- numme bloss Mitglied!-

 

1970: Präsidentin, d`Frau Eglauf hät es Fäscht,

10 Johr lang git sie für d`Frauerige s`Best.

So es Schiffli stüüre isch nüd immer liecht,

bsunders denn, wenn d`Fluet i bricht!-

 

s`Arbon isch de Spieltag gsi,

au Ermatinge isch do debi.

Um Pünktli häd mir kämpft,

doch de Pokal, de hät üs klemmt.

 

Üse Verein, de wachst jetzt immer,

neu sind Ribi, Amsler, Singer.

Gfalle tuet`s ne sicher do,

Turne isch en gsunde Sport!-

 

1971: D `Maisammlig händ mir dure g`führt,

e guet`s Werk gstartet für`s Rotchrüz.

Üse Kassier, de isch sicher froh,

hät er i d`Kasse 300.- Fr. übercho.

 

Scho wieder e Reis, das isch allerhand,

dasmol goht`s is Bernerland.

Magglinge isch üsers Ziel,

dört wo dä Jack befiehlt!-

 

Au Delegierteversammlig händ mir bsuecht,

z`Märwil hinne, so wiit furt,

d`Frau Schmid ihres Amt jetz niederleit,

d`Frau Lang hät zu ihrer Wahl jo gseit.

 

De Samichlaus, der chunnt hür au,

bis s`Schäflis dusse, im Turmbau.

au d`Frau Bügler, wo neu isch zue üs cho,

hät er nüd in Sack inne gno.

 

1972 turnet händ mir fliessig das Johr,

noch Appell vo der Leiteri 44 mol.

De Stundebsuech isch au nüd schlecht,

üsi Rosmarie bietet halt nu s`Best.

 

Kurse hät sie bsuecht überall,

im Turne und im Volleyball.

Fit isch sie, wie chas au anders si,

für`s Brevet mache bruchts e richtigi Turneri!-

 

1973: E neui Turnhalle händ mir übercho,

jetzt muesch nümme Angst ha, Decki könnti loh.

Bällele chasch so höch do wit,

bist z`letscht nüd überdeckt mit Gips!-

 

Am 1. September isch es so wit,

s`ganzi Dorf fäschtet mit.

zwä Tag lang isch`s gange,

bis si i gweiht gsi isch, üsi neui Halle.-

 

Au de Spieltag isch wieder im Programm,

chunnt doch mitmache vor em Rang.

De Wettergott isch das Johr nüd grad fair,

doch guet hät er`s gmeint, wo mir sind an Otteberg!-

 

S`Trudi Spreiter isch e fliisigi Turnerfrau,

25 Johr - devo 14 gleitet hät sie au.

Jetzt aber Trudi, wird nüd Schüch,

und chum au als Ehremitglied no zu üs!-

 

S`Johr goht langsam verbi,

und au dä Chlaus isch nüme wit.

Is Peyer`s Trotte simmer hür,

die alti Press isch Decke gsi.

 

1974: Fliessig turnet händ mir i dem Johr,

im November söll e Unterhaltig über Bühni gho!

Do sind au mir mit Freud debi,

Keule schwinge, Trube läse händ mir i g`studiert!-

 

Delegierteversammlig isch in Oberaach,

do hät sich öpe en Verein Sorge gmacht.

En Autofreie Sunntig isch - oh her je,

denn nimmsch halt s`Velo oder SBB.-

 

1975: 15 Johr hät d`Frau Eglauf s`Präsidium g`führt,

sie Leitet die letschti Johresversammlig hüt.

Als Dank für ihri g`leischtet Sach,

überchunnt sie d`Ehremitgliedschaft!-

 

Jetz aber nüd raste, gell!

wenn au d`Frau Henauer isch a dinnere Stell!

D`Klär, so rüstig und so fit,

drum übernimmt sie de Chef vo de Volleyball Lüüt!-

 

S`Johresprogramm bietet allerhand,

unter anderm e Fahrt is Nachbarland.

E Schifflifahrt bim Obetrot,

is "Fischerstüübli" zu Radiesli und Butterbrot!

 

1976: Isch s`Thurgauer Kantonalturnfestjohr,

au mir wend uf Sirnach go turne go.

Eifach isch so es Fäschtli nüd,

das git e langi Üebigsziit!-

 

1977: Trtet neu sechs Mitglieder i,

alli wänd fit mit turne si.

Nüd nu turne, au maschiere und schwimme,

während de Schuelferie, aber nüd z`Ermatinge!-

 

Uf Brambrüesch händ mer Turnfahrt gah,

nüd nu Thurgauer, au Rhintaler sind da.

Gmüetlich isch es gsi, das isch wohr,

em liebste würdet mer wieder goh, s`nöchst Johr!-

 

Bi Räge und bi Sunneschi,

isch de Spieltag z`Amriswil.

Mit gmacht hämmer - und d`kämpft!

Hei cho simmer - ohni Kränz.-

 

1978:  I dä Trube s`Triboltinge,

mir tönd üsere Leiteri es Chränzli winde!

Gäll Rosmarie, du häsch freud a dere Fraueschar,

drum bhalt dis Ämtli no e paar zäh Johr.-

 

Mir wüsset scho, es isch nüd immer Liicht,

bi soviel Fraue Oberturneri si.

Wenn mir dir en Rat chönnt gäh,

tuesch Zügel e chli schärfer näh.-

 

So, mir sind nun mit üsem Bricht am Schluss aglangt,

und säget eui no de Mitgliederbestand:

40 Mitglieder tüend mir si,

devo sind 13 Ehrenmitglieder debi!-

 

                                                             geschrieben und gedichtet

 

                                                             Friedy Heeb und Erna Henauer